জুৰীয়া: ঘন কুঁৱলীৰ ফলত জুৰীয়াৰ কান্ধুলীমাৰি অঞ্চলত সংঘটিত হোৱা এক পথ দূৰ্ঘটনাত কেইবাগৰাকীও ছাত্ৰ-ছাত্ৰী আহত হোৱা ঘটনা পোহৰলৈ আহিছে। কান্ধুলীমাৰি ছিৰাজিয়া হাইস্কুলৰ ছাত্ৰ-ছাত্ৰীক লৈ শিক্ষামূলক ভ্ৰমণলৈ যোৱা এখন বাহন উভতনি যাত্ৰাৰ সময়ত সোমবাৰে নিশা দূৰ্ঘটনাত পতিত হয় (Juria school bus accident)।
জানিব পৰা মতে, শিক্ষামূলক ভ্ৰমণ সম্পন্ন কৰি বিদ্যালয়লৈ উভতি আহি থকাৰ সময়ত স্কুল পোৱাৰ প্ৰায় ১ কিলোমিটাৰ নিলগত বাহনখন হঠাৎ নিয়ন্ত্ৰণ হেৰুৱাই পথৰ কাষত দুৰ্ঘটনাগ্ৰস্ত হয়। সেই সময়ত অঞ্চলটোত ঘন কুঁৱলী পৰা থকাৰ বাবে দৃষ্টিসীমা যথেষ্ট সীমিত আছিল (Dense fog accident Assam)।
স্থানীয় লোকসকলৰ মতে, ঘন কুঁৱলীৰ বাবেই চালকে পথ স্পষ্টকৈ নেদেখি বাহনৰ ওপৰত নিয়ন্ত্ৰণ হেৰুৱায় আৰু ফলস্বৰূপে এই দুৰ্ঘটনা সংঘটিত হয়। দুৰ্ঘটনাৰ খবৰ পাই স্থানীয় ৰাইজ ঘটনাস্থলীত উপস্থিত হৈ তৎক্ষণাৎ উদ্ধাৰ কাৰ্য আৰম্ভ কৰে (Kandhulimari accident)।
দূৰ্ঘটনাত আহত ছাত্ৰ-ছাত্ৰীসকলক তৎক্ষণাত জুৰীয়াৰ নিকটৱৰ্তী চিকিৎসালয়লৈ প্ৰেৰণ কৰা হয় (Student injured in road accident)। সৌভাগ্যক্ৰমে কোনো ছাত্ৰ-ছাত্ৰীৰ অৱস্থা সংকটজনক নহয় বুলি জানিব পৰা গৈছে, যদিও কেইবাজনৰো আঘাত গুৰুত্বপূৰ্ণ বুলি চিকিৎসকসকলে উল্লেখ কৰিছে। এই ঘটনাই অঞ্চলটোত চাঞ্চল্যৰ সৃষ্টি কৰিছে।
ঘন কুঁৱলীৰ সময়ছোৱাত বিদ্যালয় বাহন তথা যাত্ৰীবাহী গাড়ীৰ চলাচল অধিক সাৱধানতাৰে কৰিব লাগে বুলি স্থানীয় ৰাইজে দাবী উত্থাপন কৰিছে। আৰক্ষীয়ে ঘটনাস্থলীত উপস্থিত হৈ পৰিস্থিতিৰ বুজ লৈ তদন্ত আৰম্ভ কৰিছে।
লগতে পঢ়কঃ Nagaon road accident : বছৰৰ অন্তিমটো দিনত ভয়ংকৰ পথ দুৰ্ঘটনাত আহত ১১ গৰাকী লোক
