ইণ্টাৰনেশ্যনেল ডেস্ক: প্ৰধানমন্ত্ৰী নৰেন্দ্ৰ মোদীয়ে মঙলবাৰে ইথিওপিয়াৰ সৰ্বোচ্চ ৰাষ্ট্ৰীয় সন্মান গ্ৰহণ কৰি ভাৰত–ইথিওপিয়াৰ দ্বিপাক্ষিক সম্পৰ্কত এক ঐতিহাসিক অধ্যায় সংযোজন কৰিলে। ইথিওপিয়াই প্ৰধানমন্ত্ৰী মোদীক দেশখনৰ সৰ্বোচ্চ ৰাষ্ট্ৰীয় সন্মান ‘The Great Honour Nishan of Ethiopia’ প্ৰদান কৰে। এই সন্মান লাভ কৰা মোদী হৈছে ইথিওপিয়াৰ প্ৰথমগৰাকী বিশ্বনেতা ।
ইথিওপিয়াৰ প্ৰধানমন্ত্ৰী আবি আহমেদ আলিয়ে মোদীক এই সন্মান প্ৰদান কৰে। উল্লেখযোগ্য যে, এইটো হৈছে প্ৰধানমন্ত্ৰী মোদীয়ে লাভ কৰা ২৮তম সৰ্বোচ্চ বিদেশী ৰাষ্ট্ৰীয় সন্মান, যি ভাৰতৰ বৃদ্ধি পোৱা বৈশ্বিক প্ৰভাৱৰ প্ৰতিফলন (India global stature)।
সন্মান গ্ৰহণ কৰি প্ৰধানমন্ত্ৰী মোদীয়ে কয়, “এয়া মোৰ বাবে গৌৰৱৰ বিষয়। পৃথিৱীৰ এক প্ৰাচীন আৰু সমৃদ্ধ সভ্যতাৰ পৰা সৰ্বোচ্চ সন্মান লাভ কৰাটো মোৰ বাবে অত্যন্ত গৌৰৱৰ কথা। এই সন্মান মই ভাৰতৰ ১৪০ কোটি জনতাৰ নামত গ্ৰহণ কৰিছোঁ।” তেওঁ লগতে কয় যে এই সন্মান ভাৰত–ইথিওপিয়া অংশীদাৰিত্ব গঢ়ি তোলাত অৰিহণা যোগোৱা সকলো ভাৰতীয়ৰ বাবে উৎসৰ্গিত।
ভাৰতৰ প্ৰধানমন্ত্ৰী মোদীয়ে ইথিওপিয়াৰ প্ৰধানমন্ত্ৰী আবি আহমেদ আলিক ধন্যবাদ জনাই কয় যে জি-২০ শীৰ্ষ বৈঠকত হোৱা আমন্ত্ৰণৰ প্ৰতি সন্মান জনাই তেওঁ ২৪ দিনৰ ভিতৰতে ইথিওপিয়া ভ্ৰমণলৈ আহে (Abiy Ahmed Modi meeting)।
প্ৰধানমন্ত্ৰী মোদীয়ে ভাৰত–ইথিওপিয়া সম্পৰ্কত শিক্ষকৰ গুৰুত্বৰ কথা বিশেষভাৱে উল্লেখ কৰি কয় যে ভাৰতীয় শিক্ষকে ইথিওপিয়াত একাধিক প্ৰজন্ম গঢ় দিয়াত গুৰুত্বপূৰ্ণ ভূমিকা পালন কৰিছে। আজিও বহু ভাৰতীয় শিক্ষক ইথিওপিয়াৰ বিশ্ববিদ্যালয় আৰু উচ্চ শিক্ষা প্ৰতিষ্ঠানত সেৱা আগবঢ়াই আছে (Indian teachers in Ethiopia)।
এই ভ্ৰমণকালতে ভাৰত আৰু ইথিওপিয়াই দ্বিপাক্ষিক সম্পৰ্কক আনুষ্ঠানিকভাৱে ‘কৌশলগত অংশীদাৰিত্ব’লৈ উন্নীত কৰে (India Ethiopia strategic partnership)। প্ৰধানমন্ত্ৰী মোদীয়ে কয় যে এই সিদ্ধান্তই দুয়োখন দেশৰ সম্পৰ্কত নতুন গতি, নতুন শক্তি আৰু নতুন গভীৰতা প্ৰদান কৰিব।
তেওঁ কয়, “ভাৰত আৰু ইথিওপিয়া দুয়োখনেই শান্তি, গণতন্ত্ৰ আৰু মানৱ কল্যাণৰ প্ৰতি দায়বদ্ধ। গ্ল’বেল ছাউথৰ অংশীদাৰ হিচাপে আমি আন্তঃৰাষ্ট্ৰীয় মঞ্চত সদায় একেলগে থিয় হৈছোঁ।” আফ্ৰিকান ইউনিয়নক জি-২০ৰ স্থায়ী সদস্য হিচাপে অন্তৰ্ভুক্ত কৰাত ভাৰতৰ ভূমিকাকো তেওঁ স্মৰণ কৰে (India Africa relations)।
ইথিওপিয়াৰ প্ৰধানমন্ত্ৰী আবি আহমেদ আলিয়ে নিজৰ ভাষণত কয় যে ইথিওপিয়াৰ অৰ্থনীতি দৃঢ়ভাৱে আগবঢ়িছে আৰু ভাৰতৰ সৈতে সহযোগিতা দেশখনৰ বিকাশত সহায়ক হৈছে।
উল্লেখযোগ্য যে প্ৰধানমন্ত্ৰী নৰেন্দ্ৰ মোদীয়ে দুদিনীয়া ভ্ৰমণসূচীৰে মঙলবাৰে ইথিওপিয়াত উপস্থিত হৈছিল আৰু বিমানবন্দৰত তেওঁক উষ্ম আদৰণি জনোৱা হয়।
লগতে পঢ়ক: বিজয় দিৱসত ভাৰতীয় সেনাৰ প্ৰতি কৃতজ্ঞতা ৰাষ্ট্ৰপতি, প্ৰধানমন্ত্ৰী – Vijay Diwas
