গুৱাহাটী: আগন্তুক বিধানসভা নিৰ্বাচনৰ প্ৰাকক্ষণত ধুবুৰী সদৰ আসনক কেন্দ্ৰ কৰি কংগ্ৰেছ দলৰ ভিতৰচ’ৰাত এক হাহাকাৰ পৰিস্থিতিৰ সৃষ্টি হৈছে(Dhubri Congress Crisis)। কংগ্ৰেছৰ দুৰ্গ হিচাপে পৰিচিত ধুবুৰীত টিকট প্ৰত্যাশীসকলৰ মাজত চলি থকা তীব্ৰ বিবাদে বিৰোধী দলটোক বৃহৎ বিপদত পেলোৱাৰ সম্ভাৱনা আছে।
আশ্চৰ্যৰ কথা এয়ে যে, কংগ্ৰেছ দলে এতিয়ালৈকে ধুবুৰী বা ৰাজ্যৰ আন কোনো আসনৰ বাবে প্ৰাৰ্থীৰ তালিকা আনুষ্ঠানিকভাৱে ঘোষণা কৰা নাই। তাৰ মাজতে কেইবাজনো টিকট প্ৰত্যাশীয়ে নিজাববীয়াকৈ নিজৰ নাম চূড়ান্ত প্ৰাৰ্থী হিচাপে প্ৰচাৰ কৰিছে। এই ‘স্বঘোষিত প্ৰাৰ্থী’সকলৰ এনে কাৰ্যই কংগ্ৰেছ দলটোক ৰাজহুৱাভাৱে উপহাসৰ পাত্ৰ কৰি তুলিছে।
প্ৰাৰ্থীত্বক লৈ চলা এনে খেলিমেলি আৰু বিবাদে ধুবুৰীৰ তৃণমূল পৰ্যায়ৰ কংগ্ৰেছ কৰ্মীসকলৰ মাজত তীব্ৰ অসন্তুষ্টিৰ সৃষ্টি কৰিছে। দলৰ হাই কামাণ্ডে এতিয়ালৈকে কোনো সিদ্ধান্ত নোলোৱাৰ পাছতো কেইবাজনো নেতাই নিজকে প্ৰাৰ্থী সজাই ফুৰা কাৰ্যই দলীয় শৃংখলাৰো ব্যাপক ক্ষতি কৰিছে।
ধুবুৰীৰ নিৰ্বাচনী ইতিহাস
উল্লেখ্য যে, ১৯৫২ চনৰ পৰা ১৯৯১ চনলৈ ধুবুৰী সদৰ বিধানসভা আসনখন কংগ্ৰেছৰ দখলত আছিল। ১৯৯১ চনত প্ৰথমবাৰৰ বাবে দলটোৱে এই আসনখন বিজেপিৰ হাতত হেৰুৱায়। পৰৱৰ্তী সময়ত ১৯৯৬ আৰু ২০০১ চনত কংগ্ৰেছৰ নাজিবুল ওমৰে পুনৰ এই আসনখন উদ্ধাৰ কৰিবলৈ সক্ষম হৈছিল যদিও পিছলৈ এআইইউডিএফ (AIUDF)-ৰ উত্থানে ধুবুৰীত কংগ্ৰেছৰ আধিপত্য ম্লান কৰি পেলায়।
দলৰ এজন জ্যেষ্ঠ তৃণমূল কৰ্মীয়ে আক্ষেপেৰে কয়, “ধুবুৰী আৰম্ভণিৰে পৰা কংগ্ৰেছৰ দুৰ্গ আছিল। কিন্তু অসম প্ৰদেশ কংগ্ৰেছ কমিটিৰ (APCC) দুৰ্বল দিশ-নিৰ্দেশনা আৰু ভুল প্ৰাৰ্থী বাছনিৰ বাবেই আজি ধুবুৰীত কংগ্ৰেছ ক্ষমতাৰ পৰা বাহিৰত থাকিবলগীয়া হৈছে।”
প্ৰাৰ্থীত্বক লৈ বিৰম্বনা
আগন্তুক নিৰ্বাচনৰ বাবে কংগ্ৰেছ দলে এতিয়ালৈকে কোনো আনুষ্ঠানিক প্ৰাৰ্থী ঘোষণা কৰা নাই। কিন্তু তাৰ মাজতে তিনিজন টিকট প্ৰত্যাশী ক্ৰমে— বেবী বেগম, মাহমুদুল হুছেইন আৰু আবেদুৰ জামানে নিজাববীয়াকৈ প্ৰচাৰ চলাই নিজকে দলৰ প্ৰাৰ্থী হিচাপে জাহিৰ কৰিছে। দলীয় হাই কামাণ্ডৰ সিদ্ধান্তৰ পূৰ্বেই তেওঁলোকে চলোৱা এনে ‘নিজৰ ঢোল নিজে কোবোৱা’ প্ৰচাৰে ধুবুৰী কংগ্ৰেছক ৰাজহুৱাভাৱে যথেষ্ট বিৰম্বনা আৰু লজ্জাজনক পৰিস্থিতিত পেলাইছে।
ধুবুৰী কংগ্ৰেছত হাহাকাৰ: অভিযুক্ত আৰু জামিন হেৰুওৱা নেতাই বিচাৰিছে নিৰ্বাচনী টিকট!
ধুবুৰীৰ কংগ্ৰেছৰ টিকট প্ৰত্যাশীসকলৰ বিৰুদ্ধে উত্থাপন হৈছে কেবাটাও গুৰুতৰ অভিযোগ। জিলা পৰিষদৰ সদস্যা বেবী বেগমৰ বিৰুদ্ধে জিলা পৰিষদৰ বিভিন্ন কাম-কাজত দুৰ্নীতিৰ সৈতে জড়িত থকাৰ অভিযোগ আছে। একেদৰে, আন এজন প্ৰাৰ্থী প্ৰত্যাশী আবেদুৰ জামানে ২০১৬ চনৰ বিধানসভা নিৰ্বাচনত ধুবুৰী আসনৰ পৰাই প্ৰতিদ্বন্দ্বিতা কৰিছিল যদিও তেওঁৰ নিৰ্বাচনী জামানত পৰ্যন্ত বাজেয়াপ্ত (Security deposit forfeited) হৈছিল।
দলীয় নেতৃত্বক বাধা দিয়াৰ অভিযোগ
নাম প্ৰকাশত অনিচ্ছুক এজন কংগ্ৰেছ নেতাই অভিযোগ কৰি কয়, “এই তিনিজন প্ৰাৰ্থী প্ৰত্যাশী ক্ৰমে— বেবী বেগম, মাহমুদুল হুছেইন আৰু আবেদুৰ জামানে ধুবুৰীত এক গুণ্ডাৰাজ সদৃশ পৰিৱেশৰ সৃষ্টি কৰিছে। তেওঁলোকে দলীয় নেতৃত্বক (APCC আৰু AICC) তৃণমূল পৰ্যায়ৰ কৰ্মী বা সাধাৰণ ৰাইজৰ ওচৰলৈ যাবলৈ নিদিয়ে। বৰঞ্চ, ধুবুৰীৰ প্ৰকৃত পৰিস্থিতি বুজিবলৈ অহা দলীয় পৰ্যবেক্ষকসকলক ধনৰ প্ৰলোভন দি নিজৰ হাত কৰিবলৈহে তেওঁলোকে চেষ্টা চলাইছে।”
এই ধৰণৰ ৰাজনৈতিক খেলিমেলিয়ে ধুবুৰীত কংগ্ৰেছৰ স্থিতি অধিক দুৰ্বল কৰি তোলা বুলি তৃণমূল কৰ্মীসকলে মত প্ৰকাশ কৰিছে।
লগতে পঢ়ক: নগাঁও-বটদ্ৰৱা সমষ্টিত কোন হব কংগ্ৰেছ-বিজেপিৰ প্ৰাৰ্থী
