গুৱাহাটী : ৰাজ্যত বান পৰিস্থিতি ক্ৰমাৎ উন্নতিৰ দিশে আগবাঢ়ি থকাৰ মাজতে পুনৰ উদ্বেগ বৃদ্ধি কৰিছে বতৰ বিভাগৰ নতুন পূৰ্বাভাসে। ভাৰতীয় বতৰ বিজ্ঞান বিভাগে (IMD) আগন্তুক ৩ৰ পৰা ৪ দিনৰ ভিতৰত অসমৰ বিভিন্ন স্থানত ধুমুহাসহ প্ৰবলৰ পৰা অতি প্ৰবল বৰষুণ হোৱাৰ সম্ভাৱনা ব্যক্ত কৰিছে। এই পৰিপ্ৰেক্ষিতত অসম ৰাজ্যিক দুৰ্যোগ ব্যৱস্থাপনা কৰ্তৃপক্ষই (ASDMA) জনসাধাৰণক সতৰ্ক হৈ থাকিবলৈ আৰু প্ৰয়োজনীয় সাৱধানতা অৱলম্বন কৰিবলৈ আহ্বান জনাইছে।
বতৰ বিজ্ঞান বিভাগৰ পূৰ্বাভাস অনুসৰি, ৩০ জুলাইৰ পৰা ১ আগষ্ট, ২০২৬ লৈ অসমৰ লগতে উত্তৰ পূৰ্বাঞ্চলৰ বিভিন্ন প্ৰান্তত ধুমুহাসহ প্ৰবল বৰষুণ হোৱাৰ সম্ভাৱনা আছে। বিশেষকৈ অৰুণাচল প্ৰদেশৰ ইষ্ট ছিয়াং, লোহিত, নামচাই, লংডিং, পাপুমপাৰে, ল’ৱাৰ সোৱণশিৰি আৰু ল’ৱাৰ ডিবাং ভেলী জিলাত প্ৰবলৰ পৰা অতি প্ৰবল বৰষুণ হ’ব পাৰে। ইয়াৰ প্ৰভাৱ অসমৰ সীমান্তৱৰ্তী কেইবাখনো জিলাত পৰাৰ আশংকা কৰা হৈছে।
অৰুণাচল প্ৰদেশৰ সংলগ্ন অঞ্চলসমূহত ধাৰাসাৰ বৰষুণৰ ফলত অসমৰ তিনিচুকীয়া, ধেমাজি আৰু লখিমপুৰ জিলাত বতৰজনিত প্ৰভাৱ পৰিব পাৰে বুলি জানিব পৰা গৈছে। তিনিচুকীয়া জিলাৰ বাবে অ’ৰেঞ্জ এলাৰ্ট জাৰি কৰা হৈছে।
ইফালে, নাগালেণ্ডৰ মন, মোককচুং আৰু ৱখা জিলাৰ বাবেও অ’ৰেঞ্জ এলাৰ্ট জাৰি কৰা হৈছে। এই অঞ্চলসমূহত হ’বলগীয়া প্ৰবল বৰষুণৰ প্ৰভাৱ অসমৰ চৰাইদেউ, শিৱসাগৰ, যোৰহাট আৰু গোলাঘাট জিলাত পৰাৰ সম্ভাৱনা আছে।
বতৰ বিভাগৰ তথ্য অনুসৰি, ইষ্ট ছিয়াং, লোহিত, নামচাই, লংডিং, ল’ৱাৰ সোৱণশিৰি আৰু ল’ৱাৰ ডিবাং ভেলী অঞ্চলৰ অধিকাংশ ঠাইত ধুমুহা আৰু বিজুলী-ঢেৰেকণিসহ প্ৰতিদিনে ৬ৰ পৰা ১১ চেণ্টিমিটাৰ পৰ্যন্ত প্ৰবল বৰষুণ হোৱাৰ সম্ভাৱনা আছে। আনহাতে, পাপুমপাৰে জিলাৰ কিছু বিচ্ছিন্ন স্থানত ১২ৰ পৰা ২০ চেণ্টিমিটাৰ পৰ্যন্ত অতি প্ৰবল বৰষুণ হ’ব পাৰে।
এই ধাৰাসাৰ বৰষুণৰ ফলত অসমৰ বিভিন্ন অঞ্চলত পুনৰ জলমগ্নতা, বান পৰিস্থিতি, আকস্মিক বান, পথত পানী জমা, যান-বাহনৰ গতি মন্থৰ হোৱা আদি সমস্যাৰ সৃষ্টি হোৱাৰ আশংকা কৰা হৈছে। তদুপৰি পাহাৰীয়া আৰু ভূমিস্খলনপ্ৰৱণ অঞ্চলসমূহত স্থানীয়ভাৱে ভূমিস্খলনৰ আশংকাও বৃদ্ধি পাব পাৰে।
পৰিস্থিতিৰ প্ৰতি লক্ষ্য ৰাখি জিলা প্ৰশাসন আৰু অসম ৰাজ্যিক দুৰ্যোগ ব্যৱস্থাপনা কৰ্তৃপক্ষই পৰিস্থিতিৰ ওপৰত গভীৰভাৱে নজৰ ৰাখিছে। যিকোনো সম্ভাৱ্য জৰুৰী পৰিস্থিতিৰ সৈতে মোকাবিলা কৰিবলৈ সংশ্লিষ্ট বিভাগসমূহক সতৰ্ক কৰি ৰখাৰ লগতে জৰুৰীকালীন সঁহাৰি ব্যৱস্থাও সাজু কৰি ৰখা হৈছে।
ASDMA ই সংশ্লিষ্ট জিলাসমূহৰ জনসাধাৰণক সকলো ধৰণৰ প্ৰয়োজনীয় সাৱধানতা অৱলম্বন কৰি সতৰ্ক হৈ থাকিবলৈ আহ্বান জনাইছে। বিশেষকৈ দৈনিক যাতায়াত কৰা লোক আৰু দীঘলীয়া পথৰ যাত্ৰীসকলক ধাৰাসাৰ বৰষুণৰ সময়ত অপ্ৰয়োজনীয় যাত্ৰা এৰাই চলিবলৈ আৰু বতৰৰ অৱস্থা বিবেচনা কৰি যাত্ৰাৰ পৰিকল্পনা কৰিবলৈ পৰামৰ্শ দিয়া হৈছে।
নিম্নাঞ্চল আৰু পাহাৰীয়া এলেকাত বসবাস কৰা লোকসকলক বান বা ভূমিস্খলনৰ যিকোনো লক্ষণ দেখা দিলে তৎক্ষণাত সতৰ্ক হ’বলৈ কোৱা হৈছে। প্ৰশাসনে জাৰি কৰা নিৰ্দেশনা মানি চলাৰ লগতে চৰকাৰী বতৰ সতৰ্কবাণী আৰু স্থানীয় প্ৰশাসনৰ পৰামৰ্শৰ প্ৰতি লক্ষ্য ৰাখিবলৈও জনসাধাৰণক আহ্বান জনোৱা হৈছে।
অসম ৰাজ্যিক দুৰ্যোগ ব্যৱস্থাপনা কৰ্তৃপক্ষই সময়ে সময়ে নিজৰ চৰকাৰী ৱেবছাইট আৰু সামাজিক মাধ্যমৰ জৰিয়তে বতৰ তথা পৰিস্থিতি সম্পৰ্কীয় নতুন তথ্য প্ৰকাশ কৰিব বুলি জানিবলৈ দিছে। আগন্তুক কেইদিনত বৰষুণৰ তীব্ৰতা বৃদ্ধি পোৱাৰ সম্ভাৱনাৰ প্ৰতি লক্ষ্য ৰাখি সকলোকে সতৰ্ক, সচেতন আৰু প্ৰস্তুত হৈ থাকিবলৈ অনুৰোধ জনোৱা হৈছে।
