গুৱাহাটী: অসমৰ সাম্প্ৰতিক ভয়াৱহ বানপানীয়ে ৰাজ্যৰ বহু অঞ্চলত ব্যাপক ক্ষতি সাধন কৰিছে। বানৰ ফলত বহু পৰিয়ালে নিজৰ ঘৰ-বাৰী, সা-সম্পত্তি আৰু জীৱন-জীৱিকাৰ সম্বল হেৰুৱাই অসহায় পৰিস্থিতিৰ সন্মুখীন হৈছে। সংকটৰ এই কঠিন সময়ত বানপীড়িত লোকসকলৰ কাষত থিয় দিছে অসমৰ জনপ্ৰিয় কণ্ঠশিল্পী দীপলীনা ডেকা।
কেইদিনমান পুৰ্বে বানাক্ৰান্ত অঞ্চল ভ্ৰমণ কৰি বন্যাৰ্তৰ দুখ দুৰ্দশা নিজ চকুৰে প্ৰত্যক্ষ কৰি কান্দোনত ভাগি পৰিছিল জনপ্ৰিয় কণ্ঠশিল্পী দীপলীনা ডেকা। নিজ চকুৰে বানাক্ৰান্তৰ দুৰ্দশাৰ ছবি দেখাৰ পাচত শুকুৰবাৰে এশ বানাক্ৰান্ত গৃহহীন পৰিয়ালৰ বাবে গৃহ নিৰ্মাণ কৰি দিয়াৰ কথা ঘোষণা কৰে কণ্ঠশিল্পী দীপলীনা ডেকাই।
বানত ঘৰ হেৰুৱাই আশ্ৰয়হীন হৈ পৰা পৰিয়ালসমূহক নতুন আশাৰ বতৰা দি দীপলীনা ডেকাই ১০০ টা বানপীড়িত পৰিয়ালৰ বাবে ১০০ টা ঘৰ নিৰ্মাণ কৰি দিয়াৰ ঘোষণা কৰিছে। তেওঁৰ এই মানবীয় আৰু হৃদয়স্পৰ্শী পদক্ষেপে ৰাজ্যজুৰি ব্যাপক প্ৰশংসা লাভ কৰিছে।
দীপলীনা ডেকাই জনোৱা অনুসৰি, বানৰ ফলত সৰ্বস্ব হেৰুওৱা আৰু ঘৰ-বাৰী ক্ষতিগ্ৰস্ত হোৱা দৰিদ্ৰ পৰিয়ালসমূহক সহায় কৰাৰ উদ্দেশ্যৰে এই উদ্যোগ গ্ৰহণ কৰা হৈছে। দীপাৱলীৰ পূৰ্বে এই ১০০ টা ঘৰ নিৰ্মাণৰ কাম সম্পূৰ্ণ কৰাৰ লক্ষ্য লোৱা হৈছে। নতুন ঘৰ লাভৰ জৰিয়তে বানত ক্ষতিগ্ৰস্ত পৰিয়ালসমূহে পুনৰ স্বাভাৱিক জীৱনলৈ ঘূৰি অহাৰ সুযোগ লাভ কৰিব বুলি আশা প্ৰকাশ কৰা হৈছে।
বানপীড়িতসকলৰ দুখ-কষ্টৰ সময়ত কেৱল আৰ্থিক সহায় আগবঢ়োৱাই নহয়, স্থায়ী বাসগৃহ নিৰ্মাণৰ দৰে এক বৃহৎ দায়িত্ব গ্ৰহণ কৰি দীপলীনা ডেকাই সমাজৰ প্ৰতি নিজৰ দায়বদ্ধতাৰ এক নিদৰ্শন দাঙি ধৰিছে। তেওঁৰ এই পদক্ষেপে বহু আশ্ৰয়হীন পৰিয়ালৰ জীৱনলৈ নতুন পোহৰ কঢ়িয়াই আনিব বুলি ধাৰণা কৰা হৈছে।
দীপলীনা ডেকাৰ এই মহানুভৱতাক সামাজিক মাধ্যমতো বহু লোকে শলাগ লৈছে। বানৰ বিভীষিকাৰ মাজত ক্ষতিগ্ৰস্ত পৰিয়ালসমূহৰ বাবে তেওঁৰ এই ঘোষণা এক নতুন আশা আৰু সাহসৰ বতৰা হিচাপে পৰিগণিত হৈছে। শিল্পীৰ কণ্ঠৰে মানুহক আনন্দ দিয়া দীপলীনাই এইবাৰ মানৱতাৰ আহ্বানত সঁহাৰি জনাই বানপীড়িত পৰিয়ালসমূহক নতুন ঠিকনা দিয়াৰ দায়িত্ব লোৱাত সকলো মহলতে প্ৰশংসাৰ জোৱাৰ উঠিছে।
