ধিং: নগাঁৱৰ ধিঙত অগ্নিকাণ্ডত সৰ্বস্ব হেৰুওৱা দুৰ্ভগীয়া পৰিয়ালৰ কাষত থিয় দিছে ধিং সমষ্টিৰ বিধায়ক মেহবুব মোক্তাৰ। পটিয়া চাপৰি-ৰৌমাৰী গাঁও পঞ্চায়তৰ বৰ'ৰাধাআটীত ভয়ংকৰ অগ্নিকাণ্ডত বাসগৃহৰ লগতে ঘৰৰ সকলো সা-সম্পত্তি হেৰুৱাই দিশহাৰা হৈ পৰা আকবৰ আলীৰ পৰিয়ালটোক মুখ্যমন্ত্ৰীৰ সাহায্য পুঁজিৰ পৰা ৫০ হাজাৰ টকাৰ আৰ্থিক সাহায্য প্ৰদান কৰে বিধায়কগৰাকীয়ে। আনহাতে, ধিং সমষ্টিৰ লেৰুৱামুখত অগ্নিকাণ্ডত ক্ষতিগ্ৰস্ত হোৱা আন ছটা পৰিয়ালকো সাহায্যৰ চেক প্ৰদান কৰে বিধায়ক মেহবুব মোক্তাৰে।
উল্লেখ্য যে, যোৱা ১৯ ছেপ্টেম্বৰৰ নিশা ধিং সমষ্টিৰ পটিয়া চাপৰি-ৰৌমাৰী গাঁও পঞ্চায়তৰ বৰ'ৰাধাআটীত আকবৰ আলীৰ বাসগৃহত চিলিণ্ডাৰ বিস্ফোৰণৰ ফলত সংঘটিত হৈছিল এক ভয়ংকৰ অগ্নিকাণ্ড। নিমিষতে বিয়পি পৰা জুইৰ লেলিহান শিখাই আগুৰি ধৰিছিল পৰিয়ালটোৰ বাসগৃহ। এই অগ্নিকাণ্ডত সম্পূৰ্ণৰূপে ভস্মীভূত হৈছিল ঘৰখন। ঘৰৰ ভিতৰত থকা সা-সম্পত্তিৰ লগতে নগদ ধন, হাঁহ-কুকুৰা, গৰু-ছাগলী আদি জুইত জাহ যায়। ফলত পৰিয়ালটোৱে মূৰৰ ওপৰৰ চালিখনৰ লগতে জীৱনজোৰা কষ্টৰে সাঁচি ৰখা সম্পদসমূহো হেৰুৱাবলগীয়া হয়।
অগ্নিকাণ্ডটোৰ ফলত পৰিয়ালটোৰ প্ৰায় পাঁচ লক্ষাধিক টকাৰ ক্ষয়-ক্ষতি হোৱা বুলি জানিব পৰা গৈছিল। হঠাৎ অহা এই দুৰ্যোগে আকবৰ আলীৰ পৰিয়ালটোক গভীৰ সংকটৰ মাজলৈ ঠেলি দিছিল। বাসগৃহটো সম্পূৰ্ণৰূপে জুইত জাহ যোৱাৰ পিছত পৰিয়ালটোৰ সন্মুখত সৃষ্টি হৈছিল নতুনকৈ ঘৰ নিৰ্মাণ কৰাৰ লগতে দৈনন্দিন জীৱন পুনৰ স্বাভাৱিক কৰি তোলাৰ প্ৰত্যাহ্বান।
অগ্নিকাণ্ডৰ খবৰ লাভ কৰাৰ লগে লগে বিধায়ক মেহবুব মোক্তাৰে ক্ষতিগ্ৰস্ত পৰিয়ালটোৰ কাষত থিয় দিছিল। কেৱল সমবেদনা জ্ঞাপন বা আশ্বাস প্ৰদান কৰাতে সীমাবদ্ধ নাথাকি বিধায়কগৰাকীয়ে নিজাববীয়াকৈ পৰিয়ালটোক আৰ্থিক সাহায্যও আগবঢ়াইছিল। তদুপৰি, অগ্নিকাণ্ডৰ দুদিনমানৰ পিছতে পৰিয়ালটোৱে যাতে নতুনকৈ ঘৰ নিৰ্মাণ কৰি আশ্ৰয়ৰ ব্যৱস্থা কৰিব পাৰে, তাৰ বাবে টিনপাতৰ ব্যৱস্থাও কৰি দিছিল বিধায়কগৰাকীয়ে।
ইয়াৰ পিছতে বুধবাৰে মুখ্যমন্ত্ৰীৰ সাহায্য পুঁজিৰ পৰা আকবৰ আলীৰ পৰিয়ালটোক ৫০ হাজাৰ টকাৰ এখন চেক প্ৰদান কৰে বিধায়ক মেহবুব মোক্তাৰে। অগ্নিকাণ্ডত সৰ্বস্ব হেৰুওৱাৰ পিছত লাভ কৰা এই আৰ্থিক সাহায্যই পৰিয়ালটোক কিছু পৰিমাণে সকাহ প্ৰদান কৰে। সাহায্যৰ চেকখন লাভ কৰাৰ সময়ত আৱেগিক হৈ পৰে পৰিয়ালটোৰ মুৰব্বী আকবৰ আলী। দুৰ্যোগৰ সময়ত বিধায়কগৰাকীয়ে আগবঢ়োৱা সহায়ৰ বাবে তেওঁলোকৰ পৰিয়ালৰ লগতে স্থানীয় ৰাইজেও কৃতজ্ঞতা প্ৰকাশ কৰে।
লেৰুৱামুখৰ অগ্নিকাণ্ডত ক্ষতিগ্ৰস্ত ছটা পৰিয়ালকো সাহায্য:
ইফালে, ধিং সমষ্টিৰ লেৰুৱামুখতো যোৱা ২২ ছেপ্টেম্বৰত সংঘটিত হৈছিল আন এক ভয়ংকৰ অগ্নিকাণ্ড। এই অগ্নিকাণ্ডত প্ৰায় ছটা পৰিয়ালৰ বাসগৃহ সম্পূৰ্ণৰূপে ভস্মীভূত হৈছিল। জুইত ঘৰ-দুৱাৰৰ লগতে ঘৰুৱা সা-সম্পত্তি হেৰুৱাই পৰিয়ালকেইটা গভীৰ সমস্যাৰ সন্মুখীন হ'বলগীয়া হৈছিল।
এই পৰিয়ালকেইটাৰ দুৰৱস্থাৰ প্ৰতি লক্ষ্য ৰাখি মাত্ৰ ডেৰ মাহৰ ভিতৰতেই মুখ্যমন্ত্ৰীৰ সাহায্য পুঁজিৰ অধীনত তেওঁলোককো আৰ্থিক সাহায্যৰ চেক প্ৰদান কৰে বিধায়ক মেহবুব মোক্তাৰে। অগ্নিকাণ্ডৰ ফলত ক্ষতিগ্ৰস্ত হোৱা পৰিয়ালসমূহে যাতে পুনৰ নিজৰ জীৱন স্বাভাৱিক অৱস্থালৈ ঘূৰাই আনিবলৈ কিছু সহায় লাভ কৰে, সেই উদ্দেশ্যে এই সাহায্য প্ৰদান কৰা হয়।
সামগ্ৰিকভাৱে, ধিং সমষ্টিত শেহতীয়াকৈ সংঘটিত হোৱা দুটাকৈ অগ্নিকাণ্ডত ক্ষতিগ্ৰস্ত পৰিয়ালসমূহৰ কাষত থিয় দি আৰ্থিক সাহায্য আগবঢ়োৱা বিধায়ক মেহবুব মোক্তাৰৰ পদক্ষেপক লৈ সমষ্টিটোত চৰ্চা চলিছে। দুৰ্যোগৰ সময়ত সৰ্বস্ব হেৰুওৱা পৰিয়ালসমূহক তাৎক্ষণিক সহায়ৰ লগতে পুনৰ সংস্থাপনৰ ক্ষেত্ৰতো সহযোগিতা আগবঢ়োৱাটো অত্যন্ত গুৰুত্বপূৰ্ণ বুলি বিবেচিত হৈছে। বিপদৰ সময়ত লাভ কৰা এনে সহায়ে ক্ষতিগ্ৰস্ত পৰিয়ালসমূহক নতুনকৈ জীৱন আৰম্ভ কৰাৰ ক্ষেত্ৰত কিছু পৰিমাণে সাহস আৰু সকাহ প্ৰদান কৰিব বুলি আশা কৰিছে স্থানীয় ৰাইজে।
