কাজিৰঙা: বিশ্বখ্যাত কাজিৰঙা ৰাষ্ট্ৰীয় উদ্যানত পৰ্যটকৰ বাবে নতুন নিয়ম প্ৰৱৰ্তনৰ সিদ্ধান্ত গ্ৰহণ কৰিছে অসম চৰকাৰৰ বন বিভাগে। আগন্তুক পৰ্যটন বৰ্ষৰ পৰা কাজিৰঙা ৰাষ্ট্ৰীয় উদ্যানত পৰ্যটকে মোবাইল ফোন লগত লৈ প্ৰৱেশ কৰিব নোৱাৰিব। একে সময়তে হাতী ছাফাৰী আৰু জীপ ছাফাৰীৰ ক্ষেত্ৰতো কেতবোৰ নতুন ব্যৱস্থা গ্ৰহণ কৰা হৈছে।
শনিবাৰে কাজিৰঙাত অনুষ্ঠিত এক গুৰুত্বপূৰ্ণ পৰ্যালোচনা সভাৰ অন্তত এই সিদ্ধান্তসমূহ ঘোষণা কৰে অসমৰ বনমন্ত্ৰী জয়ন্তমল্ল বৰুৱাই। সভাত কেবিনেট মন্ত্ৰী কেশৱ মহন্ত, অজন্তা নেওগ, অতুল বৰা আৰু জয়ন্তমল্ল বৰুৱাৰ লগতে সাংসদ কামাখ্যা প্ৰসাদ তাচা উপস্থিত থাকে। কাজিৰঙাৰ পৰ্যটন ব্যৱসায়ৰ সৈতে জড়িত অংশীদাৰ আৰু বন বিভাগৰ উচ্চপদস্থ বিষয়াসকলৰ সৈতে হোৱা পৰ্যালোচনা বৈঠকত ৰাষ্ট্ৰীয় উদ্যানখনৰ পৰ্যটন ব্যৱস্থা অধিক নিয়ন্ত্ৰিত আৰু পৰিৱেশ অনুকূল কৰাৰ বাবে কেইবাটাও গুৰুত্বপূৰ্ণ সিদ্ধান্ত গ্ৰহণ কৰা হয়।
বনমন্ত্ৰী জয়ন্তমল্ল বৰুৱাই জানিবলৈ দিয়া অনুসৰি, ২০২৫ চনত সৰ্বোচ্চ ন্যায়ালয়ে জাৰি কৰা নিৰ্দেশনাৰ আধাৰত কাজিৰঙা ৰাষ্ট্ৰীয় উদ্যানত পৰ্যটকৰ মোবাইল ফোন ব্যৱহাৰ আৰু প্ৰৱেশৰ ক্ষেত্ৰত থাকিব নতুন নিয়ম। অৰ্থাৎ, আগন্তুক পৰ্যটন বৰ্ষৰ পৰা কাজিৰঙালৈ ছাফাৰী কৰিবলৈ অহা পৰ্যটকে উদ্যানখনৰ ভিতৰলৈ মোবাইল ফোন লৈ যাব নোৱাৰিব।
বন বিভাগৰ এই সিদ্ধান্তৰ অন্যতম লক্ষ্য হৈছে ৰাষ্ট্ৰীয় উদ্যানখনৰ স্বাভাৱিক পৰিৱেশ আৰু বন্যপ্ৰাণীৰ ওপৰত পৰ্যটনৰ প্ৰভাৱ হ্ৰাস কৰা। কাজিৰঙা হৈছে এক সংবেদনশীল বন্যপ্ৰাণী বাসস্থান। সেয়েহে পৰ্যটকৰ সংখ্যা বৃদ্ধি পোৱাৰ সমান্তৰালভাৱে উদ্যানখনৰ পৰিৱেশ যাতে কোনো ধৰণে ক্ষতিগ্ৰস্ত নহয়, সেই বিষয়টোত বিশেষ গুৰুত্ব আৰোপ কৰিছে বন বিভাগে।
ছাফাৰীৰ বাবে আগতীয়া অনলাইন বুকিং বাধ্যতামূলক
নতুন নিয়ম অনুসৰি কাজিৰঙা ৰাষ্ট্ৰীয় উদ্যানত হাতী ছাফাৰী আৰু জীপ ছাফাৰী কৰিবলৈ আগ্ৰহী পৰ্যটকে আগতীয়াকৈ অনলাইন বুকিং কৰিব লাগিব। এই ব্যৱস্থাৰ জৰিয়তে পৰ্যটকৰ ভিৰ নিয়ন্ত্ৰণ কৰাৰ লগতে ছাফাৰী ব্যৱস্থাটো অধিক শৃংখলাবদ্ধ কৰাৰ লক্ষ্য লোৱা হৈছে।
ইয়াৰ উপৰি আগন্তুক পৰ্যটন বৰ্ষৰ পৰা কাজিৰঙাত হাতী আৰু জীপ ছাফাৰীৰ নিৰিখ বৃদ্ধি কৰাৰ সিদ্ধান্তও গ্ৰহণ কৰা হৈছে। প্ৰায় ১২ বছৰৰ পাছত ছাফাৰীৰ নিৰিখ পুনৰ নিৰ্ধাৰণ কৰাৰ সিদ্ধান্ত লৈছে বন বিভাগে।
কঁহৰা-বাগৰিত পৰ্যটকৰ ভিৰ নিয়ন্ত্ৰণৰ ব্যৱস্থা:
কাজিৰঙা ৰাষ্ট্ৰীয় উদ্যানৰ চাৰিটা মুখ্য বনাঞ্চলৰ ভিতৰত কঁহৰা আৰু বাগৰি বনাঞ্চলত পৰ্যটকৰ সংখ্যা তুলনামূলকভাৱে অধিক। পৰ্যটকৰ অত্যধিক সমাগমে এই অঞ্চলসমূহৰ পৰিৱেশৰ ওপৰত অতিৰিক্ত চাপ সৃষ্টি কৰাৰ আশংকা আছে।
এই বিষয়টো বিবেচনা কৰি আগন্তুক পৰ্যটন বৰ্ষৰ পৰা পৰ্যটকৰ ভিৰ নিয়ন্ত্ৰণৰ বাবে বিশেষ ব্যৱস্থা গ্ৰহণ কৰা হ’ব। কঁহৰা আৰু বাগৰিৰ ওপৰত থকা অতিৰিক্ত চাপ হ্ৰাস কৰি ৰাষ্ট্ৰীয় উদ্যানখনৰ চাৰিওটা বনাঞ্চলতে পৰ্যটকৰ সমাগম নিশ্চিত কৰাৰ লক্ষ্য লোৱা হৈছে।
বন বিভাগে আশা কৰিছে যে, পৰ্যটকসকলক বিভিন্ন বনাঞ্চললৈ সমানে বিতৰণ কৰিব পাৰিলে একাংশ অঞ্চলত সৃষ্টি হোৱা অত্যধিক পৰ্যটন চাপ হ্ৰাস পাব। ইয়াৰ ফলত বন্যপ্ৰাণীৰ স্বাভাৱিক বিচৰণ আৰু উদ্যানখনৰ পৰিৱেশ তন্ত্ৰ সংৰক্ষণত সহায় হ’ব।
পৰ্যটন আৰু সংৰক্ষণৰ মাজত ভাৰসাম্য ৰখাৰ লক্ষ্য:
কাজিৰঙা ৰাষ্ট্ৰীয় উদ্যান অসমৰ পৰ্যটন উদ্যোগৰ অন্যতম প্ৰধান আকৰ্ষণ। প্ৰতি বছৰে দেশ-বিদেশৰ পৰা হাজাৰ হাজাৰ পৰ্যটক কাজিৰঙালৈ আহে। পৰ্যটকৰ সংখ্যা বৃদ্ধি পোৱাৰ লগে লগে স্থানীয় অৰ্থনীতি আৰু পৰ্যটন ব্যৱসায়ত ইতিবাচক প্ৰভাৱ পৰিছে যদিও একে সময়তে উদ্যানখনৰ সংবেদনশীল পৰিৱেশৰ ওপৰত ইয়াৰ প্ৰভাৱৰ বিষয়টোও গুৰুত্বসহকাৰে বিবেচনা কৰা হৈছে।
সেয়েহে আগন্তুক পৰ্যটন বৰ্ষৰ পৰা মোবাইল ফোন নিষিদ্ধকৰণ, অনলাইন ছাফাৰী বুকিং, ছাফাৰীৰ নিৰিখ বৃদ্ধি আৰু চাৰিওটা বনাঞ্চলত পৰ্যটকৰ সম সমাগমৰ দৰে সিদ্ধান্তৰ জৰিয়তে কাজিৰঙাত নিয়ন্ত্ৰিত আৰু বহনক্ষম পৰ্যটন ব্যৱস্থা গঢ়ি তোলাৰ লক্ষ্য লৈছে বন বিভাগে।
নতুন নিয়মসমূহে একে সময়তে পৰ্যটকৰ অভিজ্ঞতা, বনাঞ্চলৰ পৰিৱেশ আৰু বন্যপ্ৰাণীৰ সুৰক্ষাৰ মাজত ভাৰসাম্য ৰখাত কিমান সহায়ক হয়, সেয়া আগন্তুক পৰ্যটন বৰ্ষত বিশেষভাৱে লক্ষ্যণীয় হ’ব।
