নগাঁও: দেশৰ নিৰাপত্তা বাহিনীৰ কঠোৰ প্ৰশিক্ষণৰ ক্ষেত্ৰত পুনৰ উজলি উঠিল অসমৰ এগৰাকী প্ৰতিভাৱান মহিলা নিৰাপত্তাৰক্ষী। নেচনেল ছিকিউৰিটি গাৰ্ড (NSG) ৰ প্ৰথমটো মহিলা কমাণ্ডো প্ৰশিক্ষণ পাঠ্যক্ৰমত অসাধাৰণ পাৰদৰ্শিতা প্ৰদৰ্শন কৰি দুটাকৈ শ্ৰেষ্ঠত্বৰ সন্মান অৰ্জন কৰিবলৈ সক্ষম হৈছে ছাবিনা ইয়াছমিনে। প্ৰথম চিডিঅ’ বেটেলিয়নৰ (1st CDO BN) ছাবিনা ইয়াছমিনে প্ৰশিক্ষণৰ অন্তত ‘Best Overall Trainee’ আৰু ‘Best in Physical’ শীৰ্ষক দুয়োটা সন্মান লাভ কৰি নিজৰ দক্ষতা, শাৰীৰিক সক্ষমতা আৰু অধ্যৱসায়ৰ পৰিচয় দাঙি ধৰিছে।
উল্লেখ্য যে, NSGৰ উদ্যোগত অনুষ্ঠিত এই প্ৰথমটো মহিলা কমাণ্ডো প্ৰশিক্ষণ পাঠ্যক্ৰমত সমগ্ৰ দেশৰ বিভিন্ন প্ৰান্তৰ পৰা নিৰ্বাচিত ২৭০ গৰাকী অত্যন্ত শাৰীৰিকভাৱে সক্ষম মহিলা নিৰাপত্তাৰক্ষীয়ে অংশগ্ৰহণ কৰিছিল। কঠোৰ বাচনি প্ৰক্ৰিয়াৰ মাজেৰে নিৰ্বাচিত এইসকল প্ৰশিক্ষাৰ্থীৰ মাজত শ্ৰেষ্ঠত্ব অৰ্জন কৰাটো আছিল এক বৃহৎ প্ৰত্যাহ্বান। কিন্তু নিজৰ অসাধাৰণ শাৰীৰিক সক্ষমতা, একাগ্ৰতা, সাহস আৰু কঠোৰ পৰিশ্ৰমৰ জৰিয়তে সেই প্ৰত্যাহ্বান সফলতাৰে অতিক্ৰম কৰিলে ছাবিনা ইয়াছমিনে।
প্ৰশিক্ষণৰ সময়ছোৱাত অনুষ্ঠিত বিভিন্ন শাৰীৰিক সক্ষমতাৰ পৰীক্ষাত ছাবিনাই বিশেষ পাৰদৰ্শিতা প্ৰদৰ্শন কৰে। শাৰীৰিক পৰীক্ষাসমূহত তেওঁ আন সকলো প্ৰশিক্ষাৰ্থীক পিছ পেলাই শীৰ্ষস্থান দখল কৰাৰ লগতে সমগ্ৰ প্ৰশিক্ষণ পাঠ্যক্ৰমৰ মূল্যায়নতো প্ৰথম স্থান লাভ কৰিবলৈ সক্ষম হয়। তেওঁৰ এই সাফল্যই কেৱল ব্যক্তিগত কৃতিত্বৰ পৰিচয় দিয়াই নহয়, ভৱিষ্যতে এই প্ৰশিক্ষণত অংশগ্ৰহণ কৰিবলগীয়া মহিলা কমাণ্ডো প্ৰশিক্ষাৰ্থীসকলৰ বাবেও প্ৰেৰণা যোগাইছে।
বিশেষকৈ NSGৰ দৰে দেশৰ এক অত্যন্ত দক্ষ আৰু বিশেষ প্ৰশিক্ষণপ্ৰাপ্ত নিৰাপত্তা বাহিনীৰ অধীনত অনুষ্ঠিত প্ৰথমটো মহিলা কমাণ্ডো প্ৰশিক্ষণত ২৭০ গৰাকী প্ৰশিক্ষাৰ্থীৰ ভিতৰত সামগ্ৰিকভাৱে প্ৰথম স্থান লাভ কৰাটো ছাবিনা ইয়াছমিনৰ বাবে এক উল্লেখযোগ্য সফলতা হিচাপে বিবেচিত হৈছে।
ছাবিনা ইয়াছমিনৰ এই কৃতিত্বই কঠোৰ পৰিশ্ৰম, আত্মবিশ্বাস আৰু দৃঢ় সংকল্প থাকিলে মহিলাসকলেও যিকোনো কঠিন প্ৰত্যাহ্বান সফলতাৰে অতিক্ৰম কৰিব পাৰে, সেই কথাক পুনৰ প্ৰতিপন্ন কৰিলে। তেওঁৰ এই সাফল্যই আগন্তুক দিনত মহিলা নিৰাপত্তাৰক্ষীসকলক বিশেষ প্ৰশিক্ষণ আৰু কমাণ্ডো বাহিনীত অধিক পাৰদৰ্শিতা প্ৰদৰ্শনৰ বাবে উৎসাহিত কৰিব বুলি আশা কৰা হৈছে।
দেশৰ ২৭০ গৰাকী প্ৰশিক্ষাৰ্থীৰ মাজত শ্ৰেষ্ঠত্ব অৰ্জন কৰি ছাবিনা ইয়াছমিনে স্থাপন কৰা এই কৃতিত্ব নিঃসন্দেহে প্ৰেৰণাদায়ক। তেওঁৰ এই সাফল্যই অসমৰ লগতে সমগ্ৰ দেশৰ মহিলা নিৰাপত্তাৰক্ষীসকলৰ বাবে এক গৌৰৱ আৰু অনুপ্ৰেৰণাৰ নিদৰ্শন হৈ ৰ'ব।