ইণ্টাৰনেশ্যনেল ডেস্ক: আমেৰিকাৰ উপকূলৰক্ষী বাহিনীয়ে উত্তৰ আটলাণ্টিকত ৰাছিয়াৰ পতাকাযুক্ত এখন তেলবাহী জাহাজ জব্দ কৰাৰ পিছতে ব্ৰিটিছ প্ৰধানমন্ত্ৰী কিয়েৰ ষ্টাৰমাৰে ৰাষ্ট্ৰপতি ডনাল্ড ট্ৰাম্পৰ সৈতে বাৰ্তালাপ কৰে। উল্লেখযোগ্য যে আমেৰিকাৰ এই অভিযানত ব্ৰিটিছ সশস্ত্ৰ বাহিনীয়ে ‘সহায়ক সমৰ্থন’ (Enabling support) আগবঢ়াইছিল। – Russia Oil Tanker Seized
ডাউনিং ষ্ট্ৰীটৰ এক বিবৃতিত জনোৱা হৈছে যে বুধবাৰে সন্ধিয়া দুয়োগৰাকী নেতাই ফোনযোগে হোৱা বাৰ্তালাপত ‘বেলা ১’ (Bella 1) নামৰ জাহাজখনক বাধা দিয়াৰ যুটীয়া অভিযানৰ বিষয়ে আলোচনা কৰে। ৰাষ্ট্ৰীয় নিষেধাজ্ঞা উলংঘনকাৰীৰ বিৰুদ্ধে কঠোৰ পদক্ষেপ লোৱাৰ লগতে ইউক্ৰেইনৰ শেহতীয়া অগ্ৰগতি আৰু ভেনিজুৱেলাত আমেৰিকাৰ অভিযানৰ বিষয়েও তেওঁলোকে আলোচনা কৰে।
যুক্তৰাজ্যৰ প্ৰতিৰক্ষা মন্ত্ৰালয়ে (MoD) জনোৱা মতে, আমেৰিকাৰ এই অভিযানত সহায়ৰ বাবে ব্ৰিটেইনে ৰয়েল এয়াৰ ফৰ্চৰ (RAF) নিৰীক্ষণকাৰী বিমান আৰু ৰয়েল নেভিৰ সহায়কাৰী জাহাজ ‘আৰএফএ টাইডফ’ৰ্চ’ (RFA Tideforce) নিয়োগ কৰিছিল। প্ৰতিৰক্ষা সচিব জন হীলিয়ে কয় যে এই পূৰ্ব-পৰিকল্পিত পদক্ষেপৰ বাবে ব্ৰিটেইনে আগবঢ়োৱা সমৰ্থন “আন্তঃৰাষ্ট্ৰীয় আইনৰ সম্পূৰ্ণ সন্মত”। তেওঁ পুনৰ দোহাৰে যে যুক্তৰাজ্য আৰু আমেৰিকাৰ প্ৰতিৰক্ষা তথা নিৰাপত্তাৰ সম্পৰ্ক বিশ্বৰ ভিতৰতে আটাইতকৈ গভীৰ।
ভেনিজুৱেলাৰ সৈতে জড়িত ‘মেৰিনেৰা’ নামৰ টেংকাৰখন, যিখনক পূৰ্বে ‘বেলা ১’ (Bella 1) নামেৰে জনা গৈছিল, আমেৰিকাই ইৰাণ-বিৰোধী নিষেধাজ্ঞাৰ অধীনত ব্লেক লিষ্টেড কৰিছিল। জানিব পৰা মতে, জাহাজখনে সাগৰৰ মাজত নিজৰ পৰিচয় সলনি কৰাৰ উদ্দেশ্যে ট্ৰেন্সপাণ্ডাৰসমূহ (transponders) বন্ধ কৰি দিছিল আৰু ভুৱা পতাকা ব্যৱহাৰ কৰি যাত্ৰা কৰিছিল।
প্ৰতিৰক্ষা সচিব জন হীলিয়ে কয়, “আমাৰ যুক্তৰাজ্যৰ সশস্ত্ৰ বাহিনীয়ে ৰাছিয়া অভিমুখে আগবাঢ়ি থকা ‘বেলা ১’ (Bella 1) জাহাজখন আমেৰিকাই বাধা দিয়াৰ সফল অভিযানত অত্যন্ত দক্ষতা আৰু পেচাদাৰীত্ব প্ৰদৰ্শন কৰিছে। এই পদক্ষেপ নিষেধাজ্ঞা উলংঘনকাৰীসকলৰ বিৰুদ্ধে চলোৱা গোলকীয় অভিযানৰ এক অংশ।”
তেওঁ লগতে কয়, “এক কুখ্যাত ইতিহাস থকা এই জাহাজখন ৰাছিয়া-ইৰাণৰ নিষেধাজ্ঞা এৰাই চলাৰ এক অক্ষৰ অংশ, যিয়ে মধ্য-প্ৰাচ্যৰ পৰা ইউক্ৰেইনলৈকে সন্ত্ৰাসবাদ, সংঘৰ্ষ আৰু যন্ত্ৰণাৰ ইন্ধন যোগাই আহিছে। আমাৰ ৰাষ্ট্ৰীয় নিৰাপত্তা, অৰ্থনীতি আৰু গোলকীয় স্থিৰতা সুৰক্ষিত কৰিবলৈ যুক্তৰাজ্যই ‘শ্বেড’ ফ্লিট’ (Shadow fleet) বা ছাঁয়া জাহাজৰ কাৰ্যকলাপৰ বিৰুদ্ধে পদক্ষেপসমূহ অধিক তীব্ৰতৰ কৰি তুলিব— যাতে ব্ৰিটেইন ঘৰুৱাভাৱে সুৰক্ষিত আৰু বিদেশত শক্তিশালী হৈ থাকে।”
মন্ত্ৰীগৰাকীয়ে বুধবাৰৰ এই “সুচাৰুৰূপে সম্পন্ন কৰা অভিযান”ৰ প্ৰশংসা কৰে। তেওঁৰ মতে, এই জাহাজখন অবৈধ কাৰ্যকলাপৰ সৈতে জড়িত আছিল, যাৰ সম্পৰ্ক হিজবুল্লাহসহ আন্তঃৰাষ্ট্ৰীয় সন্ত্ৰাসবাদ আৰু অপৰাধৰ সৈতে আছে। লগতে জাহাজখন বিশ্বজুৰি দুষ্কাৰ্য আৰু বিত্ত যোগান ধৰা এক ক্ৰমবৰ্ধমান ছাঁয়া জালৰ অংশ আছিল বুলিও তেওঁ উল্লেখ কৰে।
প্ৰতিৰক্ষা সচিব হীলিয়ে হাউচ অৱ কমন্সত (House of Commons) কয়, “এইখন এখন নিষিদ্ধ ঘোষিত আৰু ৰাষ্ট্ৰহীন জাহাজ, যাৰ কুখ্যাত কাৰ্যকলাপৰ এক দীঘলীয়া ইতিহাস আছে আৰু ইয়াৰ সৈতে ইৰাণ তথা ৰাছিয়া— দুয়োখন দেশৰে নিবিড় সম্পৰ্ক আছে।”
তেওঁ লগতে কয়, “সাগৰৰ বুকুত দুষ্কাৰ্য বৃদ্ধি পোৱাৰ সময়ত যুক্তৰাজ্য কেতিয়াও নিৰ্লিপ্ত হৈ নাথাকে। আমি আমাৰ মিত্ৰশক্তিৰ সৈতে মিলি ‘শ্বেড’ ভেছেল’ (Shadow vessels) বা ছাঁয়া জাহাজসমূহৰ বিৰুদ্ধে আমাৰ প্ৰত্যাহ্বান অধিক তীব্ৰতৰ কৰি তুলিছোঁ— আৰু ই ভৱিষ্যতেও অব্যাহত থাকিব।”
“আমাৰ আমেৰিকান মিত্ৰশক্তিক এই জাহাজখন সাগৰৰ পৰা আঁতৰাই নিয়াত সহায় কৰি আমি ব্ৰিটিছ জনসাধাৰণ আৰু আমাৰ ৰাষ্ট্ৰক সুৰক্ষিত কৰিছোঁ। এই কাৰ্যই এক স্পষ্ট সোঁৱৰণি দিয়ে যে আমাৰ পৃথিৱীখন সলনি হৈছে; ই এতিয়া অধিক অনিশ্চিত আৰু বিপজ্জনক হৈ পৰিছে। এই অভিযান আৰু ছাঁয়া জাহাজৰ উপস্থিতিয়েই প্ৰমাণ কৰে যে যুক্তৰাজ্য তথা ইয়াৰ মিত্ৰশক্তিয়ে সন্মুখীন হোৱা নিৰাপত্তা জনিত ভাবুকিবোৰৰ মাজত এক বিশ্বজনীন যোগসূত্ৰ আছে।”
যোৱা কেইদিনমানত ব্ৰিটেইনৰ ‘আৰএএফ’ (RAF) ঘাটিসমূহত আমেৰিকাৰ সামৰিক বিমান অৱতৰণ কৰা দেখা পোৱাৰ পিছতে এই চৰকাৰী বিবৃতিটো প্ৰকাশ পাইছে। যদিও যুক্তৰাজ্যৰ প্ৰতিৰক্ষা মন্ত্ৰালয়ে (MoD) কোনো ধৰণৰ “অভিযানমূলক কাৰ্যকলাপ”ৰ বিষয়ে মন্তব্য কৰিবলৈ অস্বীকাৰ কৰিছে, তথাপিও এই সামৰিক তৎপৰতা তেলবাহী জাহাজখন জব্দ কৰাৰ অভিযানৰ সৈতে জড়িত আছিল বুলি বিশ্বাস কৰা হৈছে।
যুক্তৰাজ্যৰ দাবী অনুসৰি, ৰাছিয়াৰ তেল কঢ়িয়াই নিয়া এনে ‘ছাঁয়া জাহাজ’সমূহক বাধা দিয়া আৰু ব্যাহত কৰাৰ বাবে লোৱা পদক্ষেপৰ ফলস্বৰূপে ৰাছিয়াৰ গুৰুত্বপূৰ্ণ তেল ৰাজহ ২০২৪ চনৰ অক্টোবৰ মাহৰ তুলনাত ২৭ শতাংশ হ্ৰাস পাইছে। ইউক্ৰেইনৰ সৈতে যুদ্ধ আৰম্ভ হোৱাৰ পৰা ৰাছিয়াৰ তেলৰ পৰা হোৱা আয় এয়াই সৰ্বনিম্ন বুলি ব্ৰিটেইনে উল্লেখ কৰিছে।
লগতে পঢ়ক: ৰাছিয়াৰ পৰা তেল ক্ৰয় অব্যাহত থাকিলে ভাৰতৰ ওপৰত আৰু অধিক বৃদ্ধি হ’ব শুল্ক
