গুৱাহাটী: আগন্তুক ২০২৬ চনৰ বিধানসভা নিৰ্বাচনৰ প্ৰস্তুতিৰ গুৰুত্বপূৰ্ণ পদক্ষেপ হিচাপে অসমত সম্পূৰ্ণ কৰা হৈছে বিশেষ পুনৰীক্ষণ (Special Revision – SR), ২০২৬। এই প্ৰক্ৰিয়াৰ পাছতে আজি, ২৭ ডিচেম্বৰ ২০২৫ তাৰিখে ৰাজ্যজুৰি সংহত খচৰা ভোটাৰ তালিকা আনুষ্ঠানিকভাৱে প্ৰকাশ কৰে নিৰ্বাচনী আয়োগে (Assam Draft Voter List 2026)। খচৰা তালিকা অনুসৰি এইবাৰ অসমত মুঠ ভোটাৰৰ সংখ্যা ২.৫২ কোটিতকৈ অধিক হৈছে। দাবী আৰু আপত্তি নিষ্পত্তি সম্পূৰ্ণ হোৱাৰ পাছত চূড়ান্ত ভোটাৰ তালিকা ১০ ফেব্ৰুৱাৰী ২০২৬ত প্ৰকাশ পাব।
বিশেষ পুনৰীক্ষণ (SR) সম্পূৰ্ণ, খচৰা ভোটাৰ তালিকা প্ৰকাশ –
অসমৰ মুখ্য নিৰ্বাচনী বিষয়াৰ কাৰ্যালয়ে জনোৱা মতে, বিশেষ পুনৰীক্ষণ ২০২৬ৰ অংশ হিচাপে ভোটাৰৰ তথ্য ঘৰে ঘৰে পৰীক্ষা কৰা প্ৰক্ৰিয়া সম্পূৰ্ণ হোৱাৰ পাছত আজি ৰাজ্যৰ সকলো ভোটগ্ৰহণ কেন্দ্ৰ, নিৰ্বাচনী পঞ্জীয়ন বিষয়াৰ কাৰ্যালয় আৰু জিলা নিৰ্বাচনী বিষয়াৰ কাৰ্যালয়ত খচৰা ভোটাৰ তালিকা প্ৰকাশ কৰা হয় । এই পুনৰীক্ষণ প্ৰক্ৰিয়াৰ লক্ষ্য হৈছে ভোটাৰ তালিকাক অধিক শুদ্ধ, স্বচ্ছ আৰু ত্ৰুটিমুক্ত কৰা।
খচৰা ভোটাৰ তালিকাত কিমান ভোটাৰ ?
প্ৰকাশিত খচৰা ভোটাৰ তালিকা অনুসৰি অসমত এইবাৰ—
মুঠ ভোটাৰ: ২,৫২,০১,৬২৪ গৰাকী
পুৰুষ ভোটাৰ: ১,২৫,৭২,৫৮৩ জন
মহিলা ভোটাৰ: ১,২৬,২৮,৬৬২ গৰাকী
তৃতীয় লিংগ: ৩৭৯ জন
এই তালিকাত ভোটাৰৰ লিংগভিত্তিক সংখ্যা প্ৰায় সমান হোৱাটো লক্ষ্য কৰা হৈছে, যাক নিৰ্বাচনী আয়োগে ইতিবাচক দিশ হিচাপে চিহ্নিত কৰিছে।
ঘৰে ঘৰে গৈ ভোটাৰৰ তথ্য পৰীক্ষা কৰাত কি কি তথ্য পোহৰলৈ আহিল?
SR-২০২৬ৰ অংশ হিচাপে ঘৰে ঘৰে গৈ ভোটাৰৰ তথ্য পৰীক্ষা কৰা প্ৰক্ৰিয়া ২২ নৱেম্বৰ ২০২৫ৰ পৰা ২০ ডিচেম্বৰ ২০২৫লৈকে চলোৱা হয়। এই সময়ছোৱাত—
৬১,০৩,১০৩টা ঘৰত BLOসকলে পৰিদৰ্শন কৰে
২,৫১,০৯,৭৫৪ গৰাকী ভোটাৰৰ তথ্য ১০০ শতাংশ পৰীক্ষা কৰা হয়
৪,৭৮,৯৯২ গৰাকী মৃত ভোটাৰৰ নাম সোধৰণিৰ বাবে চিনাক্ত কৰা হয়
৫,২৩,৬৮০ গৰাকী ভোটাৰ স্থানান্তৰিত হোৱা বুলি ধৰা পৰে
৫৩,৬১৯টা একাধিক নাম (ডুপ্লিকেট এন্ট্ৰী) চিনাক্ত কৰা হয়
নিৰ্বাচনী আয়োগৰ মতে, এই পদক্ষেপসমূহে ভোটাৰ তালিকা শুদ্ধ কৰাৰ ক্ষেত্ৰত গুৰুত্বপূৰ্ণ ভূমিকা পালন কৰিছে।
এক বিশাল প্ৰশাসনিক ব্যৱস্থা
এই বৃহৎ প্ৰক্ৰিয়াত ৰাজ্যজুৰি—
৩৫ গৰাকী জিলা নিৰ্বাচনী বিষয়া (DEO)
১২৬ গৰাকী নিৰ্বাচনী পঞ্জীয়ন বিষয়া (ERO)
১,২৬০ গৰাকী সহকাৰী ERO
২৯,৬৫৬ গৰাকী BLO আৰু ২,৫৭৮ গৰাকী BLO ছুপাৰভাইজাৰ
আৰু ৬১,৫৩৩ গৰাকী বুথ লেভেল এজেণ্ট (BLA) সক্ৰিয়ভাৱে জড়িত আছিল। ৰাজনৈতিক দলসমূহৰ লগত নিয়মিত বৈঠক অনুষ্ঠিত কৰি এই প্ৰক্ৰিয়াত স্বচ্ছতা বজাই ৰখা হয়।
দাবী আৰু আপত্তি দাখিলৰ সুযোগ
খচৰা ভোটাৰ তালিকা প্ৰকাশৰ লগে লগে নাগৰিকসকলক নিজৰ নাম তালিকাত সন্নিবিষ্ট হৈছে নে নাই, সেয়া পৰীক্ষা কৰিবলৈ আহ্বান জনোৱা হৈছে। যদি—
- কোনো যোগ্য ভোটাৰৰ নাম বাদ পৰিছে
- নাম, বয়স, ঠিকনা আদিত ভুল আছে
- মৃত বা অযোগ্য ব্যক্তিৰ নাম অন্তৰ্ভুক্ত আছে
তেন্তে নাগৰিকে Form-6 (নতুন নাম অন্তৰ্ভুক্তি), Form-7 (আপত্তি/বাদ), Form-8 (সংশোধন/স্থানান্তৰ)ৰ জৰিয়তে দাবী বা আপত্তি দাখিল কৰিব পাৰিব।
👉 দাবী আৰু আপত্তি দাখিলৰ সময়সীমা:
২৭ ডিচেম্বৰ ২০২৫ পৰা ২২ জানুৱাৰী ২০২৬লৈ
এই সময়ছোৱাত
৩–৪ জানুৱাৰী ২০২৬
১০–১১ জানুৱাৰী ২০২৬
বিশেষ প্ৰচাৰ অভিযান আৰু গাঁও সভা/ৱাৰ্ড সভা অনুষ্ঠিত কৰা হ’ব।
চূড়ান্ত ভোটাৰ তালিকা কেতিয়া প্ৰকাশ পাব?
নিৰ্বাচনী আয়োগে প্ৰকাশ কৰা সূচী অনুসৰি—
দাবী আৰু আপত্তিৰ নিষ্পত্তি সম্পূৰ্ণ হ’ব ২ ফেব্ৰুৱাৰী ২০২৬ৰ ভিতৰত
তাৰ পাছত ১০ ফেব্ৰুৱাৰী ২০২৬ (মঙলবাৰ) তাৰিখে চূড়ান্ত ভোটাৰ তালিকা প্ৰকাশ কৰা হ’ব
নিৰ্বাচনী আয়োগে জনসাধাৰণক এই প্ৰক্ৰিয়াত সক্ৰিয়ভাৱে অংশগ্ৰহণ কৰিবলৈ আহ্বান জনাইছে যাতে আগন্তুক বিধানসভা নিৰ্বাচনৰ বাবে এক বিশ্বাসযোগ্য, শুদ্ধ আৰু অন্তৰ্ভুক্তিমূলক ভোটাৰ তালিকা নিশ্চিত কৰা যায়।
